Mu mpeshyi ya 2023 ikipe ya APR FC na Rayon Sports zihariye inkuru n'ibiganiro bya siporo mu Rwanda, bitewe n'abakinnyi aya makipe yasinyishije biganjemo abanyamahanga ku kigero kiri hejuru ya 95%.
Aya makipe azahanganira igikombe cya shampiyona n'igikombe cy'amahoro, ndetse yombi ahagararire u Rwanda mu mikino ya CAF, aho APR FC izajya muri Champions League naho Rayon Sports ikajya muri Confederation Cup.
N'ubwo umwaka w'imikino upanze gutya ku makipe yombi, umukino wa mbere uzahuza aya makipe ndetse utegerejwe na benshi uteganyijwe tariki 12 Kanama 2023, ukaba ari umukino wa Super Cup uhuza ikipe yatwaye igikombe cya shampiyona n'iyatwaye igikombe cy'amahoro.
Ku mukino uheruka Ngendahimana Eric niwe wabaye ikinyuranyo
Bitewe n'ukuntu uyu mukino utegerejwe n'abakunzi ba ruhago benshi by'umwihariko abafana b'aya makipe yombi, byari byitezwe ko hazashyirwaho ibiciro bihanitse kuri uyu mukino, gusa ibiciro FERWAFA yatangaje byishimiwe na benshi.
Byatangajwe ko ku muntu wagura itike mbere y'uko umunsi w'umukino ugera, muri VIP ni 20,000 Frw, ahatwikiriye hakaba 10,000 Frw naho ahadatwikiriye hakaba 3,000 Frw.
Ni mu gihe ku wagura itike ku munsi y'umukino yakwishyura 30,000 Frw muri VIP, 15,000 Frw ahatwikiriye, na 5,000 Frw ahadatwikiriye, ukihera ijisho uyu mukino uzatangira ku isaha ya saa 15:00.
Umukino uheruka guhuza aya makipe yombi wari umukino wa nyuma w'igikombe cy'amahoro wabereye kuri Sitade mpuzamahanga ya Huye, ukaba wararangiye Rayon Sports itahanye intsinzi kubera igitego cyatsinzwe na Ngendahimana Eric.
Ibiciro ku mukino wa Super Cup
