Igitutu gikomeje kuba kinshi mu ikipe ya Chelsea iri gutozwa na Graham Potter wafashe iyi kipe muri Nzeri nyuma y'uko Thomas Tuchel yari amaze kwirukanwa, ibintu bikaba bikomeje kuba bibi muri iyi kipe y'umuherwe Toddy Boehly.
Iyi kipe iri ku mwanya wa cumi ku rutonde rw'agateganyo rwa English Premier League, ikaba yaramaze gusezererwa muri Carabao Cup, byaje kuba agahumamunwa isezerewe na Manchester City muri FA Cup iyitsinze ibitego bine byose ku busa.
Nyuma y'iyi ntsinzwi abafana ba Chelsea ntibahishe amarangamutima yabo, ahubwo batangiye kuririmba Thomas Tuchel wirukanwe bagira bati:"We've got Super Tommy Tuchel”. Ugenekereje mu kinyarwanda, baririmbaga bavuga ko bari bafite Thomas Tuchel urenze n'ubwo yirukanwe hakaza Graham Potter.
Thomas Tuchel nta kazi afite kuva yakwirukanwa(Image:Getty)
Muri uyu mukino kandi abafana benshi ba Chelsea batangiye gusohoka muri sitade ku munota wa 39 w'umukino aho byari ibitego bitatu bya Manchester City batsinzwe hakiri kare cyane.
Abafana ba Chelsea kandi ntibarekeye aho kuko bakomeje banaririmba Roman Abramovic, umurusiya wagurishije iyi kipe mbere y'uko ifatwa na Toddy Boehly.
Usibye kuba abafana ba Chelsea batarishimiye kuba Roman Abramovic yaragurishije iyi kipe ku bw'impamvu za politiki, bababajwe cyane n'ukuntu Toddy Boehly yaje muri iyi kipe yirukana abantu bose bari bafatiye runini ikipe yabo barimo Thomas Tuchel, Petr Cech na Marina Granovskaia.
Chelsea imaze imikino irindwi idatsinda, ikaba iherereye ku mwanya wa cumi ku rutonde rwa shampiyona aho ikipe ya kane iyirusha amanota 10 bituma abafana bayo bagira impungenge ko bashobora kutazagaragara muri UEFA Champions League y'umwaka utaha.
Graham Potter ntabwo arahirwa muri Chelsea (Image:Getty)
