Kuri uyu wa Gatandatu ku isaha ya saa 21:00 nibwo kuri Ahmed bin Ali Stadium hari hataganyijwe umukino wa kimwe cya munani mu gikombe cy'isi wahuje ikipe ya Argentine na Australia.
Ni Argentine yazamutse iyoboye itsinda C n'amanota atandatu, mu gihe Australia yo yabaye iya kabiri mu itsinda D aho nayo yagize amanota atandatu ariko ikaza inyuma y'Ubufaransa.
Uyu mukino kandi wari umukino w'igihumbi Lionel Messi akinnye kuva yatangira gukina umupira nk'uwabigize umwuga, yaba mu ikipe y'Igihugu n'ama-club.
Abasore ba Argentine baje muri uyu mukino boroheje ibintu bakiharira umupira ariko ntibareme uburyo bukomeye cyane imbere y'izamu rya Australia.
Ku munota wa 35 nibwo abasore ba Argentine binjiye mu rubuga rw'amahina rwa Australia maze Nicolas Otamendi aha umupira Lionel Messi maze atsinda igitego cya mbere cya Argentine, ari nacyo cyatandukanyije impande zombi kugeza bagiye kuruhuka.
Nyuma yo kuva kuruhuka abanya-Australia bagetageje kwiminjiramo agafu maze nabo batangira gukina banataka izamu rya Argentine, ariko ku munota wa 57 bakora ikosa mu bwugarizi bwabo Julian Alvarez abiba umupira ahita atsinda igitego cya kabiri cya Argentine.
Nyuma y'iki gitego Argentine yakomeje gukina nk'iyamaze gutsinda umukino ariko abanya-Australia bo ntibacika intege bakomeza gusatira izamu rya Argentine, maze ku munota wa 77 Craig Godwin wari winjiye mu kibuga asimbuye, arekura ishoti umupira ukorwaho na Enzo Fernandez umupira ujya mu izamu.
Australia yakomeje kwataka ngo ibone igitego cya kabiri ndetse igahusha n'uburyo bukomeye cyane imbere y'izamu rya Emiliano Martinez, ariko umukino urangira Argentine itsinze Australia ibitego bibiri kuri kimwe.
Ibi bivuze ko Argentine yabonye itike ya kimwe cya kane aho ku wa Gatanu izakina n'Ubuhorandi bwatsinze Leta zunze ubumwe za Amerika ibitego bitatu kuri kimwe.
Australia yarase ibitego mu minota ya nyuma
Lionel Messi niwe wafunguye amazamu
