Rutahizamu Wout Weghorst amaze gutsinda igitego kimwe mu mikino 11 amaze gukina kuva Manchester United yamusinyisha nk'intizanyo ubwo yari aje nk'umusimbura wa Cristiano Ronaldo.
Uyu mugabo utaratwaraho igikombe mu makipe yanyuzemo yose, nawe yagize icyo atangaza mbere y'uko Manchester United ikina umukino wa nyuma wa Carabao Cup na Newcastle United.
Weghorst yagize ati:"Nshaka gutwara ibikombe ariko nshaka no gutsinda ibitego. Ni ibintu bibiri.
"Mu by'ukuri ni ingenzi gutsinda ibitego, kandi ndabizi ko mbifitiye ubushobozi kuko nabikoze kenalshi. Nizeye ko amahirwe azakomeza kuboneka, kandi kubitsinda ninge bireba.
"Nuko bimeze, ariko icy'ingenzi nuko ibyo nkora bibyarira unusaruro ikipe mu gutsinda imikino."
Igitego kimwe Wout Weghorst amaze gutsindira Manchester United, yagitsinze muri Carabao Cup aho Manchester United yakuyemo Nottingham Forest muri kimwe cya kabiri ihita igera kuri uyu mukino wa nyuma.
Avuga ku mukino wa nyuma bafite kuri iki Cyumweru, Weghorst yagize ati:"Turi mu bihe byiza kandi niyo ntumbero mfite. Ni umukino ukomeye cyane kuri twe mu gihe tuvuye mu yindi ikomeye.
"Nta gihe kiza gihari cyangwa ahantu heza harenze gutsinda igitego i Wembley. Sinigeze mpakinira ndetse sinari narigeze mpagera.
"Manchester United iraba ishaka gutsinda nk'uko na Newcastle ari uko. Hashize imyaka itandatu dutwaye igikombe, ni imyaka myinshi ku ikipe ikomeye nk'iyi. Ndizera ko iki ari icya mbere."
Umukino wa nyuma wa Carabao Cup uraza gutangira saa 18:30 kuri stade Wembley hagati ya Manchester United na Newcastle United. Umukino uheruka guhuza aya makipe muri shampiyona warangiye nta kipe irebye mu izamu ry'iyindi.
Manchester United ifite inyota y'igikombe icyo aricyo cyose kukk iyi kipe iheruka igikombe mu 2017 ubwo yatozwaga na Jose Mourinho aho yatwaye Europa League.
Weghorst yizeye ko Manchester United iza kwegukana igikombe(Net-photo)
