Ku wa Kabiri ikipe ya Madrid yanganyije na Manchester City, ku wa Gatatu AC Milan itsindwa na Inter Milan mu mikino ya kimwe cya kabiri cya UEFA Champions League.
Ku wa Kabiri no ku wa Gatatu mu cyumweru gitaha nibwo hazakinwa imikino yo kwishyura, kugira ngo hamenyekane amakipe abiri azahurira ku mukino wa nyuma biteganyijwe ko uzabera kuri Ataturk Stadium yo muri Turikiya tariki 10 Kamena 2023.
Inkuru dukesha ikinyamakuru Daily Mail iravuga ko UEFA yatangiye ibiganiro byo kureba ko uyu mukino ushobora kwimurwa ukazabera i Lisbon muri Portugal, mu gihe habura igihe kitageze ku kwezi ngo ube.
Mu gihe muri uku kwezi muri Turikiya hategangijwe amatora y'umukuru w'igihugu, hari impungenge ko ashobora gukurikirwa n'imvururu mu gihe Recep Tayyip Erdogan usanzwe ayobora iki gihugu yaba adatowe.
UEFA yiteguye gukura uyu mukino Instanbul ikawujyana i Lisbon muri Portugal nk'uko byagenze mu 2020 no mu 2021 kubera icyorezo cya Covid-19.
Ataturk Stadium biteganyijwe ko izaberaho umukino wa nyuma wa UEFA Champions League
