Ku mugoroba wo ku wa Mbere tariki 27 Gashyantare 2023 i Paris mu Bufaransa nibwo FIFA yarimo ihemba abitwaye neza muri ruhago ya 2022, Lionel Messi akaba ariwe wegukanye igihembo cy'umukinnyi w'umwaka mu bagabo ahigitse Kylian Mbappe na Karim Benzema.
David Alaba ni umwe mu batoye bagarutsweho cyane n'abatari bake, nyuma y'uko bigaragaye ko uyu myugariro wa Real Madrid yirengagije Karim Benzema bakinana muri Real Madrid agatora Lionel Messi ufatwa nk'uw'i Barcelona n'ubwo atakibarizwa muri iyi kipe yo muri Espagne.
Abafana ba Real Madrid bakomeje kwandikira uyu mugabo abandi bagatanga ibitekerezo hirya no hino ku mbuga nkoranyambaga banamwibasira, bamushinja kugambanira mugenzi we bakinana mu gihe yatoraga nka kapiteni w'ikipe y'igihugu ya Austria.
Byabaye ngombwa ko David Alaba agerageza guhosha bamwe batangiye no kumukorera irondaruhu, asobanura impamvu mu gutora yashyize Lionel Messi ku mwanya wa mbere.
Alaba yagize ati:"Ku bihembo bya FIFA The Best Awards, ikipe y'igihugu ya Austria yahisemo gutora nk'ikipe, singe ku giti cyange. Buri wese mu ikipe yahawe amahirwe yo gutora kandi nuko twabyanzuye.
Buri wese, by'umwihariko Karim Benzema azi uburyo mukunda nkanakunda ibyo akora. Naranabivuze kenshi mu bihe bitandukanye ko ariwe rutahizamu mwiza kurenza abandi ku isi kandi aracyari we, nta gushidikanya."
Nk'uko yari yabitumwe na bagenzi be yari ahagarariye, David Alaba yatoye ko Lionel Messi ariwe ukwiye guhabwa igihembo, Karim Benzema akaba uwa kabiri mu gihe Kylian Mbappe ariwe wagombaga kuba uwa Gatatu.
Alaba asobanura impamvu yatoye Lionel Messi
Messi niwe wabaye umukinnyi w'umwaka
