N'ubwo hakinwe imikino umunani yabereye mu bihugu bitandukanye ku mugabane w'u Burayi, hari imikino ibiri yarimo amakipe yo mu Bwongereza yari itegerejwe cyane kurusha indi yabaye kuri uyu munsi.
Umukino wa mbere watangiye saa 19:45 ku kibuga Estádio José Alvalade, ikipe ya Sporting Club de Portugal yari yakiriye Arsenal. Ni umukino wabonetsemo ibitego bitari bike kuko habonetsemo ibitego bine.
Arsenal yatangiye ifungura amazamu ku munota wa 22 ku gitego cyatsinzwe na William Saliba ku mupira yari ahawe na Fabio Vieira, ariko ku munota wa 34 Sporting yishyuye iki gitego gitsinzwe na Goncalo Inacio, ndetse igice cya mbere kirangira amakipe yombi anganya igitego kimwe kuri kimwe.
Nyuma y'iminota 10 gusa bavuye kuruhuka, Pedro Goncalves yahereje umupira Paulinho wahise atsindira Sporting igitego cya kabiri, ariko ku munota wa 62 Hidemasa Morita yitsinda igitego nyuma y'umupira wari utewe na Granit Xhaka bihita biba 2-2.
Uyu mukino warinze urangira nta kipe ibonye igitego cy'intsinzi bituma anganya 2-2, akaba ategereje kuzikiranura mu mukino wo kwishyura uzabera kuri Emirates Stadium ku wa Kane utaha.
Urubanza rwa Arsenal na Sporting CP ruzarangirira mu Bwongereza(Net-photo)
Undi mukino wari uraje ishinga abakunzi ba ruhago cyane muri iri joro ni umukino watangiye saa 22:00 ku kibuga Old Trafford aho ikipe ya Manchester United yari yakiriye Real Betis yo muri Espagne.
Ni umukino wa mbere Manchester United yari ikinnye nyuma yo gutsindwa ibitego 7-0 mu mukino wa shampiyona yakinnyemo na Liverpool mu mpera z'icyumweru gishize, umukino wakurikiwe n'amagambo menshi bitewe n'imyitwarire y'abakinnyi b'iyi kipe y'i Manchester.
Igice cya mbere cyarangiye amakipe yombi anganya igitego 1-1 nyuma y'uko Marcus Rashford yafunguye amazamu ku mumota wa Gatandatu. Ariko iki gitego kikaba kishyuwe na Ayoze Perez ku munota wa 32 nyuma yo guhabwa umupira na Juanmi.
Manchester United yabashije kubona ibindi bitego bitatu mu gice cya kabiri bituma isoza umukino itsinze ibitego 4-1. Antony yatsinze icya kabiri ku munota wa 52 ahawe umupira na Bruno Fernandes, Bruno Fernandes atsinda icya gatatu ku munota wa 58 nyuma ya koruneri yari itewe na Luke Shaw, mu gihe Wout Weghorst yatsinze icya kane ku munota wa 82.
Uko indi mikino yagenze:
AS Roma 2-0 Real Sociedad
Bayer Leverkusen 2-0 Ferencvaros
Union Berlin 3-3 Royale Union SG
Juventus 1-0 Freiburg
FC Sevilla 2-0 Fenerbache
Shakhtar Donetsk 1-1 Feyenoord
Aya makipe yose azakina imikino yo kwishyura ku wa Kane tariki 16 Werurwe 2023, maze haboneke amakipe azakomeza muri ¼ agana ku gikombe cya UEFA Europa League 2022-2023.
Manchester United yakandagije ikirenge kimwe muri kimwe cya kane(Net-photo)
