Amakuru ava muri Brazil avuga ko uyu mugabo w'imyaka 61 yatatswe n'umujura ahagana saa 6:00 za mu Gitondo ubwo yagendaga ku muhanda.
Uyu mugabo byarangiye yibwe imikufi ihenze asanzwe yambara mu ijosi, ubundi agenda amubwira amagambo yuje uburakari avuga ku ikipe y'igihugu ya Brazil yasezerewe mu gikombe cy'isi cya 2022 cyaberaga muri Qatar ikaba yaratozwaga n'uyu Tite.
Tite yatangiye gutoza ikipe y'igihugu ya Brazil mu 2016 ndetse ayifasha gutwara igikombe cya Copa America mu 2019, ariko iyi kipe yahabwaga amahirwe menshi cyane ku gikombe cy'isi cyo muri Qatar byarangiye inaniwe kugera muri kimwe cya kabiri.
Nyuma yo gusezererwa na Croatia kuri penariti uyu mugabo yasubiranye n'ikipe ye muri Brazil, ariko ahita atangaza ko yeguye kuri uwo mwanya yari amazeho imyaka isaga itandatu.
Ibintu bikomeje kuba bibi muri Brazil bari biteguye kongera inyenyeri ya Gatandatu ku mwambaro wabo ariko ikipe ikabatenguha, ndetse abatoza benshi bavugwaho kuba basimbura Tite mu ikipe y'igihugu. Muri abo batoza harimo Carlo Ancelotti, Zinedine Zidane, Pep Guardiola, n'abandi ariko nta biganiro birabaho.
Tite yatewe n'umujura nyuma yo kwegura mu ikipe y'igihugu ya Brazil(Image:AFP)
