Nyuma y'igihe bivugwa mu bihuha, kuri iki Cyumweru tariki 04 Kamena 2023 nibwo Real Madrid yasezeye kuri Karim Benzema wari uyimazemo imyaka 14, bikaba byitezwe ko yerekeza muri Saudi Arabia.
Carlo Ancelotti utiza Real Madrid arifuza ko iyi kipe yerekeza kuri rutahizamu Harry Kane ukinira ikipe ya Tottenham yo mu Bwongereza, bizwi ko muri iyi mpeshyi ari ku isoko kuko azasoza amasezerano ye mu mpeshyi itaha kandi adashaka kuyongera.
Umuyobozi wa Tottenham Daniel Levy we avuga ko adashaka kugurisha uyu mwongereza, ndetse byitezwe ko n'iyo yamugurisha atamutanga munsi ya miliyoni 100 z'amapawundi.
Kugurisha Harry Kane mu ikipe ikomeye ariko atari iyo muri Premier League ni igitekerezo gishobora kwakirwa neza na Daniel Levy, kuko atifuza kumuha ikipe bahangana muri Premier League.
Harry Kane uzuzuza imyaka 30 mu kwezi gutaha, we yagaragaje ko ikifuzo cye ari kuguma muri Premier League. Kane ararushwa ibitego 47 na Alan Shearer watsinze ibitego 260, akaba ariwe ufite agahigo ko gutsinda ibitego byinshi muri Premier League, Kane rero akaba ashaka kuhaguma ngo agakureho.
Ku rutonde rwa Real Madrid kandi hariho n'umudage Kai Havertz ukinira Chelsea mu bashobora gusimbura Karim Benzema ugiye kujya ahembwa arenga miliyoni y'amapawundi ku cyumweru.
Ntabwo birasobanuka neza niba Real Madrid izabasha kwemeza Harry Kane ko agomba kuva muri Premier League muri iyi mpeshyi, dore ko iyi kipe itari na tayali gutanga miliyoni 100 z'amapawundi zakwifuzwa na Tottenham.
Real Madrid yinjiye mu rugamba rwo gushaka Harry Kane(Image:Getty)
