Umukino wa kabiri wa Shampiyona ikipe y'ikiciro cya kabiri muri Sweden ikipe ya Gefle Iaf yatsinzemo Helsingborgs IF igitego 1-0, ntabwo wagendekeye neza umunyarwanda Rafael York kuko yasohotse mu kibuga ku munota wa 30 kubera imvune.
York yagize imvune y'imitsi muri uyu mukino byarangiye ikipe ye ibonye amanota atatu, ndetse byamaze kwemezwa ko agomba kumara ibyumweru bine adakina.
Rafael York ni umwe mu bakinnyi ngenderwaho ikipe y'igihugu Amavubi ifite muri iyi minsi kuko ari kwitabazwa cyane, dore ko no mu mikino ibiri u Rwanda ruherutse kunganya na Benin hose yabanzaga mu kibuga.
Ikipe y'igihugu Amavubi izongera gukenera Rafael York ku mukino u Rwanda ruzakiramo Mozambique tariki 12 Kamena mbere yo kwakira tariki 4 Nzeri 2023, ikaba ariyo mikino isigaye mu gushaka itike y'Igikombe cy'Afurika cya 2024 kizabera muri Côte d'Ivoire.
Gefle IF ya Rafael York iri ku mwanya gatandatu aho imaze kubona amanota atandatu yose, ikaba izagaruka mu kibuga ku mukino izakira Utsiktens BK ku Cyumweru tariki 23 Mata 2023, ukaba ari umukino w'umunsi wa gatatu.
Imvune ya Rafael York izatuma amara ukwezi adakina
