Uyu mugabo w’imyaka 31 asanzwe akinira Real Madrid yo muri Espagne yerekejemo avuye muri Chelsea yo mu Bwongereza ariko kuva yagera muri Eapagne ntarahirwa.
Ibihe bitari byiza amazemo imyaka isaga itatu yabikomereje mu ikipe y'igihugu Les Diables Rouges y'Ububirigi basezererwa mu gikombe cy'isi batarenze amatsinda, aho babaye aba gatatu mu itsinda F ryazamutsemo Maroc na Croatia.
Nyuma y'uku kutitwara neza muri Qatar n'umwiryane wavuzwe cyane mu ikipe yabo, uyu mugabo yabinyujije ku mbuga ze nkoranyambaga atangaza ko asezeye mu ikipe y'igihugu.
Ikiragano kiswe icya Zahabu cyarimo Eden Hazard, Kevin De Bruyne, Thibaut Courtois, Jan Vertongen, Thomas Meunier n'abandi, bose bari hejuru y'imyaka 30 ndetse bagiye kugenda ntacyo basigiye iyi kipe.
Eden Hazard yatangiye gukinira ikipe y'igihugu y'Ububirigi mu 2008 afite imyaka 17 ubwo yari mu ikipe ya Lille yo mu Bufaransa, yayikiniye imikino 126 ayitsindira ibitego 33.
Uyu mugabo avuye mu ikipe y'igihugu asizemo murumuna we Thorgan Hazard w'imyaka 29 ukinira Borussia Dortmund yo mu Budage.
Hazard yari amaze imyaka isaga 14 mu ikipe y'igihugu
