Kuri iki Cyumweru nibwo ikipe ya Liverpool yihereranye ikipe ya Manchester United ku kibuga iyitsinda ibitego 7-0 byose, harimo ibitego bibiri byatsinzwe na Mohamed Salah ku mumota wa 66 n'uwa 83.
Ni umukino ufatwa nk'umukino wa mbere ukomeye kurusha indi yose mu Bwongereza, dore ko uba wahuje amakipe afite Premier League nyinshi kurenza andi ndetse akaba ari nayo makipe yo mu Bwongereza afite UEFA Champions League nyinshi kurenza andi makipe.
Nyuma yo gutsinda ibi bitego bibiri, Mohamed Salah yabaye umukinnyi wa mbere wa Liverpool utsinze Manchester United ibitego byinshi kuva Premier League yavugururwa mu 1992. Salah yatsinze Manchester United igitego cya kenda n'icya cumi, ahita aca kuri Steven Gerrard watsinze Manchester United ibitego umunani.
Ibi bitego kandi byatumye Mohamed Salah yuzuza ibitego 130 amaze gutsindira Liverpool muri Premier League, akaba ariwe mukinnyi wa mbere umaze kuyitsindira ibitego byinshi muri iyi shampiyona ikunzwe n'abatari bake hirya no hino ku isi yose.
Kuri uru rutonde Salah akurikirwa na Robbie Fowler wayitsindiye ibitego 128, Steven Gerrard wayitsindiye 120, Michael Owen wayitsindiye 118 na Sadio Mane werekeje muri Bayern Munich amaze kuyitsindira ibitego 90 muri Premier League.
Gutsinda uyu mukino bisobanuye ikintu kinini kuri Liverpool iri kurwana inkundura yo kujya mu makipe ane ya mbere, dore ko yahise ifata umwanya wa gatanu irushwa amanota atatu na Tottenham iri ku mwanya wa kane.
Mohamed Salah akomeje gukora amateka muri Liverpool(Net-photo)
