Lionel Messi yagiriye inama FC Barcelona yo kudasinyisha Xavi Simons, umusore ikipe ya Arsenal ishaka gusinyisha mu mpeshyi ya 2023 ubwo uyu mwaka w'imikino uzaba urangiye.
Messi yakinanye na Xavi Simons mu mwaka w'imikino 2021-2022 muri Paris Saint-Germain mbere y'uko uyu musore yerekeza muri PSV Eindhoven aho akomeje kwitwara neza, kuko uyu musore amaze gutsinda ibitego 19 ndetse anatanga imipira ikenda yavuyemo ibitego muri iyi kipe.
Uyu musore w'imyaka 20 ushobora gukina hagati mu kibuga cyangwa akaba umwataka uca ku ruhande, amaze guhamagarwa mu ikipe y'igihugu y'u Buholandi incuro eshatu. Uyu musore kandi yanigaragaje mu mikino y'amatsinda ya Europa League harimo n'uwo batsinze Arsenal 2-0.
Ubwo PSG yamurekuraga, mu masezerano bagiranye na PSV Eindhoven harimo ko nibashaka kumugarura bazatanga asaga miliyoni 10 z'amapawundi, ariko nta bimenyetso iyi kipe itanga ko yaba yifuza kugarura uyu musore.
Ikipe ya Arsenal irifuza gusinyisha umukinnyi wo hagati mu mpeshyi dore kk igiye no gutandukana na Granit Xhaka, ndetse Arteta akaba ashaka no gukomeza kubaka ikipe izakomeza guhangana mu mwaka utaha w'imikino.
Inkuru dukesha ikinyamakuru El Nacional cyandikira muri Espagne, ivuga ko mu rugendo Messi yagiriye muri Espagne mu mwaka ushize yahuye n'umutoza Xavi bakaganira ku ngingo zitandukanye. Imwe mu ngingo baganiriyeho ni Xavi Simons wakuriye muri FC Barcelona.
Aho hari mu 2022 ubwo Lionel Messi yakunanaga na Xavi Simons muri PSG, akaba aribwo bivugwa ko Messi yabujije umutoza Xavi kuba yasinyisha Xavi Simons.
Uyu musore wagize umwaka mwiza mu Buhorandi akomeje kuvugwa mu makipe arangajwe imbere na Arsenal, ariko ikipe ya PSG ikaba igifite amahirwe yo kumugarura, ndetse FC Barcelona nayo ishobora kongera kwegera umwana wayo.
Xavi Simons yakinanye na Messi muri PSG (Net-photo)
