PSG yagiye gukina na Nantes muri shampiyona ya Ligue 1 Kylian Mbappe amaze gutsindira iyi kioe ibitego 200 aho yanganyaga n'umunya-Uruguay Edison Cavani usigaye akinira Valencia yo muri Espagne.
Nyuma yo kugera mu minota 90 y'umukino PSG ifite ibitego 3-2 bya Nantes, Kylian Mbapo yabashije gushyira umupira mu nshundura atsinda igitego cya 201 kimwemerera guhita arusha Edison Cavani maze aba umukinnyi watsindiye PSG ibitego byinshi mu mateka yayo.
Mbappe yatsinze ibi bitego 201 mu mikino 247 amaze gukinira PSG anyura kuri Edison Cavani watsindiye PSG ibitego 200 mu mikino 298 yayikiniye akayisohokamo mu 2020 ubwo yari yerekeje muri Manchester United.
Nyuma y'uyu mukino Mbappe yahawe igihembo(award) kiriho umubare 201 mu rwego rwo kwishimira amateka uyu musore w'imyaka 24 yanditse mu banyamujyi b'i Paris.
Mbappe yinjiye muri PSG mu 2017 ubwo yari avuye muri AS Monaco ku ntizanyo, ariko nyuma y'umwaka umwe yaguzwe miliyoni 180 z'amayelo aba umukinnyi wa kabiri wahenze kurusha abandi ku isi nyuma ya Neymar Jr bakinana muri PSG.
Kylian Mbappe yanyuze kuri Cavani mu mikino mike(Net-photo)
