Shubomi Fashola mushiki w'umuraperi wo muri Nigeria Azeez Fashola wamamaye cyane nka Naira Marley, yifatiye ku gahanga abakoresha imbuga nkoranyambaga ko ari bo batumye musaza we afungwa ashinjwa uruhare mu rupfu rw'umuraperi Mohbad.
Ilerioluwa Oladimeji Aloba amazina nyakuri y'umuraperi Mohbad, akaba yaritabye Imana ku wa 12 Nzeri 2023, mu rupfu rugiteje kururukururu mu nkiko zo muri Nigeria. Nyuma yuko Mohbad apfuye, imyigaragambyo yaratangiye bavuga ko urupfu rwe hari abarwihishe inyuma; aho Naira Marley wari bosi we mu nzu itunganya umuziki yashyizwe mu majwi.
Mushiki wa Naira Marley aravuga ko musaza we yafungishijwe n'imbuga nkoranyambaga
Ku wa 04 Ukwakira 2023, ni bwo urukiko rw'i Lagos rwategetse ko Marley na mugenzi we Sam Larry bakatirwa gufungwa iminsi 21 kugira ngo hakorwe iperereza, ni mu gihe Polisi yo yasabaga ko bafungwa iminsi 30.
Kuri iyi nshuro, mushiki wa Marley akaba yateye hejuru avuga ko gufunga umuntu iminsi 30 nta bimenyetso, nta mutangabuhamya, ari uguhonyora uburenganzira bwa muntu.
Naira Marley afunze ashinjwa uruhare mu rupfu rwa Mohbad
Shubomi, akaba yashimangiye ko igitutu cyo ku mbuga nkoranyambaga ari cyo cyatumye musaza we afungwa ku maherere. Mu butumwa bwe kuri Instagram, akaba yavuze ko niba hari ibimenyetso bimushinja, yagakwiye kuba yarakatiwe, kuko ngo ntabwo byumvikana ukuntu yamara iki gihe cyose hagikorwa iperereza.
Kuri mushiki wa Naira Marley, akaba avuga ko abantu bose bakeneye kumenya ukuri ndetse na Mohbad agahabwa ubutabera, gusa akavuga ko hari umuntu warangije gupfa; rero ko atari ngombwa ko harengana abandi kugira ngo uwapfuye ahabwe ubutabera. Akaba avuga ko niba nta bimenyetso bihari, musaza we yarekurwa byihuse.
