Nta gushidikanya ko uyu ariwo mukino ukomeye cyane ndetse uvuze byinshi kurusha indi mikino yose Manchester City yakinnye muri uyu mwaka w'imikino, mu gihe iyi kipe ishaka gukora amateka yo gutwara ibikombe bitatu mu mwaka umwe, amateka yihariwe na Manchester United gusa mu makipe yo mu Bwongereza.
Abakurikiye aya makipe yombi muri uyu mwaka w'imikino baraha Manchester City amahirwe menshi yo gukomeza, ariko ntawakwirengagiza ko iyi ari Real Madrid ifatwa nka nyiri Champions League ku mugabane w'u Burayi.
Mu mwaka ushize aya makipe yahuriye ahantu nk'aha muri UEFA Champions League birangira Real Madrid isezereye Manchester City, nyuma y'ibitego bibiri bya Rodrygo ku munota wa 90 na 92 byatumye hongerwaho iminota 30 bikarangira Real Madrid ibonye intsinzi.
Umukino ubanza wari indya nkurye
Mu gihe Manchester City yananirwa gusezerera Real Madrid muri iri joro iraba ibaye ikipe ya mbere isezerewe n'ikipe imwe muri kimwe cya kabiri cya UEFA Champions League ebyiri zikurikirana.
Itandukaniro rihari uyu mwaka bitandukanye n'umwaka ushize, nuko umukino wo kwishyura uraza kubera kuri Etihad Stadium mu gihe ubushize yasezerewe kuri Santiago Bernabeu nyamara mu rugo yari yabonye intsinzi. Kuri uyu munsi banganyirije 1-1 i Santiago Bernabeu, bivuze ko ikipe ikomeza igomba gutsindira kuri Etihad Stadium.
Manchester City imaze imikino 25 ya Champions League idatsindirwa iwayo, aho yatsinze imikino 23 inganyamo imikino ibiri. Ikipe iheruka kuyitsindira iwayo ni Liverpool yayitsinze muri Nzeri 2018.
Ni amakipe abiri yonyine yamaze imikino myinshi adatsindirwa mu rugo muri Champions League. FC Barcelona yamaze imikino 38 Camp Nou idatsindwa muri Champions League mu 2013-2020. Indi kipe ni Bayern Munich yamaze imikino 29 mu 1998-2002 idatsindirwa mu rugo muri Champions League.
Ikipe ya Real Madrid ntiyabashije kubona intsinzi mu mikino ine iheruka gusura Manchester City, aho yanganyije ibiri igatsindwa indi ibiri. Ndetse kandi imikino ibiri iheruka gusura Manchester City yose yarayitsinzwe.
Ikipe imwe yonyine Real Madrid yaba yarasuye ikabura intsinzi kurusha uko bimeze kuri Manchester City, ni AC Milan. Mu mikino irindwi yose Real Madrid yasuye AC Milan muri Champions League, yatsinzwemo itanu inganya ibiri.
Abakinnyi b'ingenzi ku mpande zombi:
Manchester City:Kevin De Bruyne
Uyu musore ukora akazi kanini muri Manchester City yararuhukijwe mu mukino bakinnye na Everton mu mpera z'icyumweru gishize, akaba araza kuba akinira mu mugongo wa Erling Haaland wari wibuze mu mukino ubanza.
De Bruyne yafashije Manchester City cyane mu cyumweru gishize mu mukino ubanza dore ko ari nawe wayitsindiye igitego, ndetse byitezwe ko n'uyu munsi ariwe uragena uko umukino wa Pep Guardiola ugenda.
Ibitego birindwi muri 14 Kevin De Bruyne amaze gutsinda muri UEFA Champions League, yabitsinze ari amashoti atereye inyuma y'urubuga rw'amahina. Kuva yajya muri Manchester City mu 2015/2016 niwe mukinnyi ufite ijanisha riri hejuru mu gutsinda ibitego bya kure muri Champions League, kuko ni 50% y'ibyo yatsinze.
Real Madrid:Vinícius Júnior
Vinícius Júnior yazonze bikomeye ikipe ya Manchester City mu mukino ubanza n'ubwo yari yafatishijwe Kyle Walker uzwiho umuvuduko uhagije ariko ntibyamubujije gutsinda igitego muri uwo mukino.
Vinícius ni umukinnyi uteye ubwoba muri Real Madrid muri uyu mwaka w'imikino kuko mu mikino 11 yakinnye muri Champions League y'uyu mwaka, yagize uruhare mu bitego 12. Uyu musore yatsinze ibitego birindwi, ndetse anatanga imipira itanu yavuyemo ibitego.
Uko amakipe ahagaze mu mikino iheruka
Manchester City ije muri uyu mukino ihagaze neza ku buryo budasanzwe. Iyi kipe ntiratsindwa mu mikino 22 y'amarushanwa iheruka gukina, aho yatsinzemo imikino 18 ikanganya imikino ine iheruka.
Iyi kipe iheruka gutsindwa tariki 05 Gashyantare 2023 ubwo yatsindwaga na Tottenham 2-1, muri Premier League. Manchester City kandi yatsinze imikino 11 yose iheruka muri Premier League, niramuka itsinze Chelsea mu mpera z'icyumweru izahita yegukana Premier League ku nshuro ya gatatu yikurikiranya.
Manchester City yatsinzwe umukino umwe gusa mu mikino 16 ya Champions League iheruka, ikaba itaratsindwa kuva yatsindwa na Real Madrid muri kimwe cya kabiri mu mwaka ushize.
Real Madrid yo iheruka gutsinda Getafe igitego kimwe muri La liga n'ubwo bitabujije mukeba wayo FC Barcelona kwegukana igikombe nyuma yo gutsinda Espanyol ibitego 4-2.
Real Madrid iherutse kwegukana Copa del Rey ariko irabizi ko igikombe cya shampiyona byarangiye, bivuze ko Champions League ariryo rushanwa ryonyine isigaranyeho ikizere. Real Madrid imaze imikino irindwi yo gukuranamo(Knockout) idatsindwa muri Champions League, aho yatsinze imikini itandatu ikanganya umwe gusa(harimo na za final).
Umukino uheruka guhuza amakipe yombi
Wari umukino ubanza wabereye i Santiago Bernabeu ku wa Kabiri w'icyumweru gishize. Igitego Vinicius yatsinze mu gice cya mbere n'igitego Kevin De Bruyne yatsinze mu gice cya kabiri, byatumye amakipe yombi anganya 1-1.
Manchester City yihariye umupira ku kigero cya 68% ndetse ibasha guhana passe 315 kuri 125 za Real Madrid. Real Madrid yasoje uyu mukino ariyo iri hejuru, dore ko mu minota ya nyuma Karim Benzema na Aurelien Tchouameni bagerageje uburyo bukomeye ariko bikanga.
Urebye uko umukino wagenze kuva ku mumota wa mbere kugeza ku wa nyuma, amakipe yombi akwiye kwishimira kuba umukino wararangiye anganya 1-1.
Prediction
Twifashishije Super Computer ya Opta yagaragaje ko bitewe n'uko amakipe yombi ahagaze, Manchester City ifite amahirwe angana na 59.1% yo gutsinda umukino mu minota 90, mu gihe Real Madrid ifite 19.7%. Kunganya umukino bakongeraho iminota 30 nabyo bifite amahirwe angana na 21.2%.
Ikipe ya Manchester City irabura Nathaniel Ake wenyine, mu gihe abakinnyi bose ba Real Madrid bo bari tayali kuri uyu munsi.
Ku isaha ya saa 21:00 nibwo kuri Etihad Stadium uyu mukino uraza kuba utangiye, ukaba uraza gusifurwa n'umunyapolonye Szymon Marciniak wasifuye umukino wa nyuma w'Igikombe cy'isi cya 2022.
