Kuri uyu wa Gatanu tariki ya 10 Ugushyingo 2023, nibwo Recording Academy iri mubategura ibihembo bya Grammy Awards, yatangaje abahanzi bahatanye kuri iyi nshuro ya 66, aho umuhanzi SZA ari we uhatanye ahantu henshi mu byiciro icyenda.
Ku mugabane w'Afurika, Abanya-Nigeria bongeye kwihesha ishema, dore ko abarimo Davido, Asake, Olamide, Burna Boy na Arya Starr bahagarariye iki gihugu. Ni mu gihe umunya-Afurika y'Epfo Tyla na we azahatana mu bihembo bya Grammy.
Burna Boy, Olamide na Ayra Starr batanze umukoro ku bahanzi bo muri Nigeria
Kuri iyi nshuro, abahanzi bo muri Nigeria Burna Boy, Olamide na Ayra Starr bakaba batanze umukoro ku bandi bahanzi bo muri Nigeria. Nka Burna Boy, yabaye umuhanzi wo muri Nigeria uhatanye ahantu henshi, dore ko ahatanye mu byiciro bine.
Burna Boy kandi, yabaye umuhanzi wo muri Nigeria uhatanye muri ibi bihembo inshuro eshanu zose zikurikiranya guhera 2019 kugera uyu mwaka. Indirimbo yuyu musore yise ‘Sittin’ On Top of The World’ ikaba yabaye indirimbo y'umunyafurika ihatanye mu cyiciro cya Best Melodic Rap Performance category.
Burna Boy ni we munya-Nigeria uhantanye mu byiciro byinshi muri Grammy Awards
Ku rundi ruhande, umuraperi Olamide yakoze amateka yo kuba ari we muraperi wo muri Nigeria utoranyijwe mu bihembo Grammy, aho indirimbo 'Amapiano' yafatanyije na Asake ari yo yamuhesheje gutoranywa muri ibi bihembo; aho iyi ndirimbo izahatana mu cyiciro cya Best African Music Performance.
Naho kandi, umuhanzikazi Ayra Starr, yabaye umuhanzi ukiri muto wo muri Nigeria utoranyijwe muri Grammy Awards. Indirimbo ye 'Rush' ikaba yamuhesheje gutoranywa aho ihatanye mu cyiciro cya Best African Music Performance. Dore urutonde rw'abahatanye bose muri Grammy Awards 2024.
