Nyuma y'uko iminota 90 y'umukino yari yarangiye Arsenal inganya na Bournemouth ibutego 2-2, Reis Nelson yatsindiye Arsenal igitego cya gatatu ku munota wa 97 bituma iyi kipe y'i London icyura amanota atatu.
Iki gitego cyatumye abakinnyi ba Arsenal bari hanze y'ikibuga na staff(abatoza, abaganga n'abandi) bari ku ntebe y'abasimbura bahita basimbukira mu kibuga bajya kwishimana n'abakinnyi bari bakiri mu kibuga.
Inkuru dukesha ikinyamakuru Football London iravuga ko umusifuzi Chris Kavanagh yaba yaratanze raporo muri FA irimo ubu buryo Arsenal yishimiye igitego kuri uyu mukino.
Kugeza kuri ubu ntibiramenyekana niba Arsenal ishobora guhanwa kubera kwishimira igitego gutya, ariko biravugwa ko iperereza ryo FA yamaze kuritangira.
Amategeko ya IFAB agenderwaho mu mupira w'amaguru ku isi agena ko aba bari ku ntebe y'abasimbura barimo abatoza, abaganga n'abandi baba bagomba kuguma mu mwanya bagenewe mu gihe umukino ukomeje, usibye abashobora guhabwa uruhushya n'umusifuzi rwo kwinjira mu kibuga nk'abaganga bagiye kwita ku mukinnyi uvunitse.
Nyuma y'umukino, umutoza wa Bournemouth witwa Gary O'Neil we yatangaje ko uburyo bishimiyemo igitego ntacyo bimutwaye.
Yagize ati:"Batsinze igitego, ubwo rero bashobora kukishimira uko babishaka."
Iki gitego cyaje ari ingirakamaro cyane kuri Arsenal kuko cyatumye ibona amanota atatu, ikongera kurusha Manchester City amanota atanu.
Nyuma yo gutsinda igitego staff n'abasimbura ba Arsenal bagiye mu kibuga
