Mu myaka umunani Marco Asensio amaze muri Real Madrid, uyu musore amaze gukina imikino 285. Byitezwe ko uyu musore ashobora kuva muri iyi kipe mu mpeshyi ubwo amasezerano ye azaba arangiye.
Inkuru yashyizwe hanze na Radio Onda Cero yo muri Espagne, yemeza ko ikipe ya Arsenal yiteguye kuba yasinyisha uyu musore w'imyaka 27 akaba yayifasha kongera imbaraga mu busatirizi.
Arsenal yagaragaje bwa mbere kwifuza uyu musore mu mpeshyi ishize, ariko kuri iyi nshuro ishobora kumubona itiriwe imutangaho amafaranga yo kumugura.
Arsenal irifuza cyane Marco Asensio(Net-photo)
Si iyi kipe imwifuza gusa kuko inkuru dukesha ikinyamakuru Marca ivuga ko Aston Villa, PSG na AC Milan nazo ziri gukurikirana amakuru y'uyu musore ngo zirebe uko zamusinyisha.
Umutoza Mikel Arteta arifuza kongera imbaraga mu ikipe ye dore ko igiye kongera kujya muri Champions League bwa mbere kuva mu mwaka w'imikino 2016/2017.
Marco Asensio yakinnye imikino 30 muri La liga y'uyu mwaka, ariko imikino 15 niyo yonyine yabanje mu kibuga kuko indi yagiye ajyamo asimbuye. Muri iyo mikino yatsinzemo ibitego ikenda, ndetse atanga imipira itandatu yavuyemo ibitego.
Uyu musore kandi yatsinze ibitego bitatu mu mikino ya UEFA Champions League harimo n'icyo yatsinze Chelsea muri kimwe cya kane, mbere y'uko ikurwamo na Manchester City.
AC Milan na PSG nazo zirifuza Asensio (Image:Getty)
