Mu gihe Real Madrid ikomeje ibihe bitari byiza aho irushwa amanota umunani na FC Barcelona iyoboye urutonde rwa shampiyona, inkuru dukesha ikinyamakuru Sport iravuga ko Florentino Perez ashobora gufata umwanzuro akirukana uyu Carlo Ancelotti wayifashije gutwara Champions League iheruka.
Kuri uyu wa Gatanu nibwo inkuru yabaye gikwira bivugwa ko Carlo Ancelotti yaba yamaze kwemera gutoza ikipe y'igihugu ya Brazil iherutse kwirukana Tite wayitozaga mu gikombe cy'isi giherutse kubera muri Qatar.
Ancelotti ashobora kuva muri Real Madrid (Image:Getty)
Bivugwa ko mu gihe Perez yaba afashe umwanzuro wo kwirukana Carlo Ancelotti, Zinedine Zidane wayinyuzemo ari umukinnyi ndetse n'umutoza, yiteguye kugaruka kuyitoza mu gihe yasinyisha abandi bakinnyi bakomeye.
Mu bakinnyi Sport ivuga Zidane yifuza ko yazana nabo muri Real Madrid harimo umusore wa Lyon witwa Rayan Cherki, akaba ari umusore ukomeje kwigarurira umutima we. Uyu musore w'imyaka 19 ni umufaransa wataka anyuze ku ruhande, akaba yifuzwa n'andi makipe arimo PSG.
Zinedine yafashije Real Madrid kwegukana UEFA Champions League eshatu zikurikirana hagati ya 2016 na 2018 ndetse ayifasha no gutwara La liga ebyiri. Iyi kipe yayitoje kuva 2016 kugeza 2028, agaruka 2019 ageza mu 2021.
Kuva muri Gicurasi 2021 yegura ku kazi ko gutoza Real Madrid, Zidane ntayindi kipe yigeze atoza. Byagiye bivugwa ko yahakaniye amakipe yamwifuje arimo Manchester United n'ikipe y'igihugu ya Brazil.
Zidane ashobora kugaruka i Madrid(Image:AFP)
