Ikipe ya Arsenal yagarutse neza muri UEFA Champions League yari ikumbuye itangira itsinda PSV Eindhoven ibitego bine byose ku busa, gusa stade y'iyi kipe ntabwo yitwaga Emirates Stadium nk'uko bisanzwe.
Kuva mu 2006 itahwa ubwo Arsenal yari ivuye Highbury, iyi stade ifite imyanya 60,704 yitwa Emirates Stadium kugeza muri uyu mwaka wa 2023, ariko kuki ititwaga Emirates Stadium mu ijoro ryahise?
Bitewe n'amabwiriza ya UEFA agenga ibijyanye n'abafatanyabikorwa b'amakipe, stade ya Arsenal muri Champions League izajya yitwa Arsenal Stadium aho kuba Emirates Stadium.
Emirates Stadium izajya iba Arsenal Stadium muri Champions League
UEFA mu marushanwa yayo ntabwo ijya ikoresha amazina ya stade arimo abafatanyabikorwa, ndetse si Arsenal yonyine kuko nka Bayern Munich stade yayo isanzwe yitwa Allianz Arena ariko muri Champions League yitwa Munich Arena, Etihad Stadium ya Manchester City yitwa City of Manchester Stadium ndetse n'izindi stade zigenda zihindurirwa amazina muri Champions League.
Bukayo Saka yafunguriye Arsenal amazamu, Leandro Trossard ashyiramo icya kabiri, Gabriel Jesus ashyiramo icya gatatu ndetse Martin Odegaard ashyiramo icya kane, bifasha Arsenal gutangira iyoboye itsinda rya B n'amanota atatu izigamye ibitego bine.
Arsenal yagarutse neza muri Champions League
