Weekend With Adele: Adele yibagije abafana be agahinda ko kumutegereza amezi 11

Weekend With Adele: Adele yibagije abafana be agahinda ko kumutegereza amezi 11

 Nov 19, 2022 - 19:22

Umunsi wambere "Weekend With Adele" wabaye akataraboneka, Adele y'iyunga n'abafana.

Adele yashimiye abafana ko  bamugarukiye mu ijoro ryo gufungura gahunda y’ibitaramo bye i Las Vegas.

Uyu muhanzikazi yashimye abafana bari bategereje iki gitaramo hafi umwaka nyuma y’uko kitabereye igihe cyagombaga kubera.

Ku wa Gatanu, yahawe amashyi menshi ubwo yageraga ku rubyiniro ahitwa Caesars Palace, maze na we yivugira ko iki gitaramo ari cyiza rwose.

Adele akigera ku rubyiniro yeretswe urukundo n'abafana, maze biramurenga amarira arisuka[Getty Images]

Mu ijambo ry’amarangamutima, uyu  muririmbyikazi w’imyaka 34 y’amavuko, yafunguye iki gitaramo abwira abafana ko agomba kubaha amashyi menshi yo kubashimira. Yavuze ko rimwe na rimwe ashobora guhinda umushyitsi kubera ibyishimo byinshi.

Bamwe mu bari bateraniye aho bari bategereje amezi 11 kugira ngo babone uyu muhanzi, wari wabateguje gukora ibitarami bigomba kumara amezi atanu, byakagombye kuba byatangiye muri Mutarama, bigasubikwa kubera ko icyorezo cya Covid-19 cyateye mu bakozi bateguraga iyi gahunda bikanatinza gahunda yo gusoza gutunganya aho ibi bitaramo byari kubera.

Mu bitabiriye igitaramo cya Adele, harimo n'uwahoze ari umukunzi Rich Paul, na we waje kumushyigikira yambaye ikoti ry'umukara[Getty Images]

Uyu muhanzikazi yari yatangaje ko isubikwa ry’iyi gahunda kuri Instagram, abwira abafana mu butumwa bwuzuye agahinda, ababwira ko iki gitaramo kitakibaye.

Indirimbo ye ya mbere ku mugoroba w'ejo ni indirimbo yo mu mwaka wa 2015”Hello”, yakiranywe urukundo rwinshi n’abafana.

Indirimbo nka “Easy On Me”, “Set Fire To The Rain” na  “Someone Like You” ziri mu zaririmbwe.

John Katsilometes, umwanditsi w’ikinyamakuru Las Vegas Review Journal wari mu gitaramo, yashimye uko uyu muhanzikazi yitwaye ku rubyiniro avuga ko ryari ijoro ridasanzwe.

Abafana baje kureba Adele bari uruvunganzoka[Getty Images]

Uyu munyamakuru yatangarije BBC ati:”Nabikunze cyane. Iri ijoro ntiryari risanzwe kuri Adele no ku bari mu gitaramo bose". 

Yakomeje agira ati “Yashimishije abantu cyane,  kandi akora  ibyo yari yitezweho. Ntekereza ko atashoboraga gusabwa ibirenze ibyo yatanze muri iri joro.”

Umwe mu bafana, Ryan Fuller, ufite imyaka 38, ukomoka i San Francisco, yavuze ko iki gitaramo ari cyiza kandi ko cyari gikwiye gutegerezwa.

Iyi gahunda y’ibitaramo bya Adele yise, “Weekend With Adele” izaba kugeza muri Werurwe, umwaka utaha.

Caesars Palace ni ahantu hasanzwe hakira ibindi bitaramo by'abahanzi bakomeye[Getty Images]

Adele yiyunze ku bandi bahanzi bagiye bakorera ibitaramo muri Caesars Palace, barimo Elton John, Cher, The Beach Boys, Celine Dion, Bette Midler, Mariah Carey n’abandi.

Uyu muhanzikazi yavuze ko ibi bitaramo nibirangira azaba afashe akaruhuko, akajya kwiga ubuvanganzo bw'Icyongereza muri kaminuza.

Igitaramo cya Adele cyari gitegerejwe n'abafana hafi amezi 11, nyuma y'uko yari yagisubitse mu ntangiriro z'uyu mwaka [Getty Images]