Kim Kardashian yagize icyo avuga ku makosa ya Balenciaga

Kim Kardashian yagize icyo avuga ku makosa ya Balenciaga

 Nov 29, 2022 - 05:23

Nyuma y'iminsi asa n'uwinumiye, Kim Kardashian yagize icyo avuga ku makosa yakozwe n'umwe mu bafatanyabikorwa be bakomeye, Balenciaga.

Iyi sosiyeti y’imyambaro yaje kwamaganwa ku mafoto y'uruhererekane yakoreshejwe mu rugendo rwo kwamamaza ibikorwa byayo, yari ariho abana bato bari kumwe n'ibirahure bya divayi.

Kim Kardashian amaze igihe kinini ari umufatanyabikorwa wa Balenciaga [Net photo]

Kim, umaze igihe kinini akorana na Balenciaga, yagize icyo avuga ku mafoto y’abana bafotorewe imbere y’inzoga

Ati: “Nari maze iminsi ntuje, ntabwo ari ukubera ko ntatunguwe cyangwa ngo bimbabaze, ahubwo ni ukubera ko nashakaga umwanya wo kuvugana n’itsinda ryabo kugira ngo niyumvire icyabibateye.”

Kim Kardashian yavuze ko na we yakomerekejwe n'amafoto y'abana Balenciaga yakoresheje, mu rwego rwo kwamamaza[Net photo]

Kim yakomeje agira ati: “Nk’umubyeyi w'abana bane, nahungabanyijwe n’aya mashusho. Umutekano w’abana ugomba kubahwa cyane kandi ikintu cyose cyawuhungabanya, ntabwo kigomba kugira umwanya muri sosiyete yacu.”

Ati: “Nishimiye uburyo Balenciaga yahise isiba amafoto yari yakoresheje yamamaza, ndetse isaba imbabazi. Mu kuvugana nabo, ndizera ko basobanukiwe n’uburemere bw’ikibazo kandi bazafata ingamba zikwiye kuri ibyo, ku buryo bitazongera kubaho ukundi.”

Balenciaga nyuma yo kwamganirwa kure rubanda bagikubita amaso amafoto yabo, yahise iyasiba yose, ndetse isaba n'imbabazi, kuko yishe uburenganzira bw'umwana[New York Post]

Yasoje agira ati:“Naho ejo hazaza hanjye na Balenciaga, ubu ndimo kongera gusuzuma umubano wanjye na bo, ndashaka kubona baba abantu birengera ibyo bakoze, kandi bakirinda gukora ibitagakwiye gukorwa.”

Kim Kardashian yababajwe n'ukuntu amafoto abana bafotowe bakikijwe n'ibirahure bya divayi, yashyizwe hanze na Balenciaga muri gahunda y'ayo yo kwamamaza [New York Post]